தொலைத்துவிட்டேன்

தொடர்ந்து சென்றேன்
தொட்டு விடவில்லை!

தொலைந்தன
தூரங்களும் நேரங்களும்

தொலைத்துவிட்டேன்
வருத்தங்கொண்டேன்

அவள் வீடு வந்தது!

நானும் ஆத்திகனானேன்!!!

எம் தலைவன்
நேற்று வரை போராளி
இன்று முதல்
இனம் காக்கும் இறைவன்

இல்லையென்பவர்க்கு இல்லை!
உண்டென்பவர்க்கு உண்டு!
நானும் ஆத்திகனானேன்!

நாளும் பூசை செய்கிறேன்!
எப்போது தோன்றுவாயென்றே
ஆசை கொள்கிறேன்!

அய்யகோ அய்யகோ என் செய்வ தய்யகோ!

அய்யகோ 
அய்யகோ
        என் செய்வ 
தய்யகோ!
        
கொய்வதோ
கொய்வதோ
        எம்மினத் தலைகளை
கொய்வதோ?
        
செய்வதோ
செய்வதோ
        இவ்வரச படைகள்
செய்வதோ!
        
மெய்யதோ
மெய்யதோ
        வந்த சேதி
மெய்யதோ?
        
உரியதோ
உரியதோ
        உமக்கிது
உரியதோ?
        
வலியதோ
வலியதோ
        எம்மினம்
வலியதோ!
        
கொடியதோ
கொடியதோ
        எம் நோக்கு
கொடியதோ?
        
உரைப்பதோ
உரைப்பதோ
        பொய்யினை
உரைப்பதோ?
        
முறையதோ
முறையதோ
        உமக்கிது
முறையதோ?
        
குவியுதோ
குவியுதோ
        பிணங்களிங்கு
குவியுதோ!
        
தணியுதோ
தணியுதோ
        உன் வெஞ்சினம்
தணியுதோ!
        
இறையிதோ
இறையிதோ
        நீர் கூறும்
இறையிதோ!
        
குறையதோ
குறையதோ
        எம் உரம்
குறையதோ?
        
சரியுதோ
சரியுதோ
        உம் பக்கஞ்
சரியுதோ!
        
புரியுதோ
புரியுதோ
        இஃதுனக்கு
புரியுதோ!
        
புலியிதோ
புலியிதோ
        காக்க வந்த
புலியிதோ!!

இந்த நாளும் கடந்து போகும்

சொந்த மண்ணும் களவு போகும்
உற்ற உறவும் அற்றுப் போகும்
பெற்றப் பிள்ளை களத்தில் சாகும்
எத்துணை உயிர்கள் தொலைந்து போகும்
எந்த னினமும் அழிந்து போகும்!!

அந்த நாளும் கடந்து போகும்
இந்த நாளும் கடந்து போனால்…
அந்த நாளும் கடந்து போகும்!

எந்த நாடும் உடைந்து போகும்
சங்கெ டுத்து முழங்கிப் போனால்…
எந்த நாடும் உடைந்து போகும்!

சிங்க தேசம் உறைந்து போகும்
இந்த தேசம் உயிர்த்து நின்றால்…
சிங்க தேசம் உறைந்து போகும்!

அந்த நாளும் கடந்து போகும்
இழந்த தேசம் நமது ஆகும்!
ஈழத் தேசம் மலர்ந்து போகும்!

எந்த நாளும் கடந்து போகும்!
இந்த நாளும் கடந்து சென்றால்...
எந்த நாளும் கடந்து போகும்!

விழுதுகளே வாருங்கள்!

விழுதுகளே வாருங்கள்!

வேர்களாய் மாறுங்கள்!

துவக்குகள் சூழ்ந்திடினும்

துயரங்கள் துடைத்தெடுப்போம்

பிக்குகள் சபித்திடினும்

தனியாட்சி அமைத்தெடுப்போம்

துளிகளின்று ஒன்றானால்

தோல்விகளென்றும் வேறாகும்

விழுதுகளே வாருங்கள்!

வேர்களாய் மாறுங்கள்!!!

அக்கரையும் இக்கரையும்!

அக்கரையில் யுத்தம்
இக்கரையில் சத்தம்

அக்கரையின் இரத்தம்
இக்கரையில் சிந்தும்

அக்கரையில் செத்தும்
இக்கரைக்கு வந்தும்

இக்கரையின் பாட்டும்
எக்கரையும் கேட்டும்

இக்கரை மட்டும்
அக்கரை நிற்கும்

அக்கரையில் வேட்டு
இக்கரையின் கூட்டு!

அக்கரையின் ஆட்டம்
இக்கரையின் ஊட்டம்!

அக்கரையில் இன்றும்
இக்கரையின் குற்றம்

எக்கரையும் என்றும்
இக்கரையைத் தூற்றும்

அக்கறையில் கூட்டம்
இக்கரையில் கூட்டும்
எக்கரையும் எட்டும்
ஆதரவு கொட்டும்!
அக்கரையை வெட்டும்!!